🔷गर्दीत माणसाचं माणूस जिवंत नाही........

खरं तर कोणत्यातरी महान कवीने असं म्हंटलय,

बंदूक रक्षकांची बनवेल भक्ष आम्हा,

झोपेल भयमुक्त अशी एकही रात्र नाही,

माझा देश आता माझ्यात राहत नाही,

गर्दीत माणसांच्या माणूस जातं नाही...

आज कोणतेही वर्तमानपत्र घ्या, कोणत्याही न्यूज चैनल लावा, व्हाट्सअप्प ओपन करा, फेसबुक लॉग इन करा, तुम्हाला प्रचंड गर्दी दिसेल...! प्रचंड गर्दी दिसेल ती माणसांची गर्दी थंड असते आया-बहिणींची अब्रू लूटताना, एखादा दुर्दैवी अपघात होतो, रक्ताच्या थारोळ्यात माणसे पडतात, तिथेही गर्दी असते; ती गर्दी मग्न असते फोटो काढण्यात शूटिंग करण्यात....

अहो..! एलफिस्टंटचा पुल पडतो, तिथेही गर्दी असते हजारोंची पण ती गर्दी धुंदीत असते माणसांना तुडवून माणसांना चिरडून स्वतःचा जीव वाचविण्यात, एखादा भूकंप होतो महापूर येतो ढिगाऱ्याखाली हाडामासाची माणसे गाडली जातात, मग तिथेही गर्दीतलाच कोणीतरी गर्दीसमोर येऊन भाषण देत असतो, तर गर्दीतलाच कोणीतरी प्रेतांच्या अंगावरचे दागिने ओरबाडण्यात मग्न असतो, गर्दी कुठे नाही...! राशनच्या दुकानात गर्दी, हॉस्पिटलभोवती गर्दी, रेल्वेमध्ये गर्दी, बसमध्ये गर्दी, पण आसपास माणसं उपाशी आहेत, लेकरं शाळेविना आहेत, हॉस्पिटलमध्ये कळ्या खुडल्या जात आहेत, शेजारच्या फ्लॅटमध्ये आजोबा औषधाविना एकटेच आहेत हे आणि असं सगळं बघायला आजच्या आमच्या गर्दीला वेळ नाही, ओ...! आज मातीच्या भिंतीला सिमेंटचा गिलावा आला पण माणुसकीचा ओलावा मात्र पापुद्रे उडावेत तसा उडून गेला. फ्लॅट सिस्टीममध्ये, अपार्टमेंटमध्ये, माणसं घरानं जवळ आली पण मनानं…..! मनानं ती तेवढीच दुरावली, आणि या सगळ्याचा परिणाम म्हणजे इथल्या माणसांची मनं मुर्दाड झाली, आणि म्हणून खरंतर आज हा विषय मांडण्याची गरज भासली...

आणि मित्रांनो मान्य आहे मला, निसर्गतः इतर प्राण्यांप्रमाणे माणूसही स्वार्थी असतो, आणि त्याने ते असावही पण आपलं भागल्यावर उरलेलं इतरांना देण्याची दानत माणूस सोडून सगळ्याच प्राण्यांमध्ये आहे. अहो...! जंगलाचा राजा सिंह देखील स्वतःचं पोट भरल्यावर उरलेली शिकार इतर प्राण्यांसाठी ठेवून जातो, मुळात गर्दीत माणूस हरवण्याचं कारण माणसांचा हव्यास, माणसाचा लोभ, अडाणी बहिणाबाई याच माणसाला उद्देशून विचारतात...

माणसा माणसा कधी होशील माणूस, 

लोभापायी झाला माणसाचा कानुस..

पण मित्रांनो एवढ सगळं जरी असलं तरी पुन्हा एकदा या भयान गर्दीत माणसाला शोधावच लागेल, आणि त्या माणसांची सुरुवात आपल्या स्वतःच्या अंतकरणापासून करावी लागेल..

जाती-धर्माच्या गर्दीत जो फक्त मी भारतीय आहे, अशी ओळख देईल ना तिथे सापडेल माणुसकी... एखादा मुलगा रस्त्यावरच्या चौकात भीक मागताना दिसेल आणि त्याच्या हातात जो पहिल्यांदा पाटी-पेन्सिल देईल ना तिथे सापडेल आम्हाला माणुसकी... एखादं झाड विनाकारण तोडताना त्या झाडाला स्वतःच्या लेकराप्रमाणे कवटाळून जो उभा राहिल ना तिथे सापडेल आम्हाला माणुसकी... हिंदू, मुस्लिम, शीख, इसाई हे शब्द जेव्हा गाडले जातील या मातीत तेव्हाच खऱ्या अर्थानं उगवून येईल इथं माणुसकी... आणि मग त्यानंतर कधीच या फेसबुकवर हा विषय मांडण्याची आम्हाला गरज भासणार नाही, कारण त्यानंतर जी गर्दी असेल ना ती माणुसकीच्या माणसांची................!

                                    - वैशाली साबळे

                                     नळकुंड(बुलडाणा)